MƏZƏNNƏLƏR

QAYNAR XƏBƏRLƏR

sigorta

1 inəyin sığortası 30-40 manatdan başlayır

1 inəyin sığortası 30-40 manatdan başlayır – Goranboyda fermerlərlə görüş

Azərbaycanda dövlət dəstəkli aqrar sığorta barədə yerli fermerləri məlumatlandırmaq məqsədilə Aqrar Sığorta Fondu və «Aqrar Sığorta Müştərək Sığorta Şirkəti» ASC-nin nümayəndələri Goranboyda fermerlərlə görüş keçirib.

Goranboy rayon icra hakimiyyətinin və yerli Dövlət Aqrar İnkişaf Mərkəzinin (DAİM) dəstəyi ilə təşkil edilən görüşdə rayonun iri, orta və kiçik fermerlik təsərrüfatlarının nümayəndələri, heyvandarlıq və əkinçiliklə məşğul olan şəxslər iştirak edib.

Görüşdə «Aqrar Sığorta Müştərək Sığorta Şirkəti» ASC-nin idarə heyətinin sədri Elvin Əliyev fermerlərə aqrar sığortanın fermerlər üçün əhəmiyyəti və şərtləri barədə məlumat verib.

Eləcə də, sığortalanan məhsullar, əhatə olunan risklər, sığorta haqları, sığortalanma üsulları və hadisə baş verərkən ödəniş prosesi açıqlanıb.

İş adamlarına bildirilib ki, hazırda aqrar sığorta vasitəsilə 14 bitki, o cümlədən buğda, arpa, qarğıdalı, çəltik, kartof, üzüm, pambıq və sair, eləcə də südlük inəkləri və balıqçılıq təsərrüfatlarını sığortalamaq mümkündür. Aqrar sığortanın əsas üstünlüyü sığorta haqqının 50%-ni dövlətin ödəməsidir. Nəticədə fermerlər cüzi ödəniş etməklə təsərrüfatı bütün əsas risklərdən sığorta edə bilərlər.

Belə ki, fermer üçün südlük inəyin sığorta haqqı 30-40 manatdan başlayır, taxıl əkini sahəsinin sığorta haqları isə Gəncə-Daşkəsən regionu üzrə 1 hektar üçün 15-20 manat ətrafındadır. Hadisə baş verdikdə dəyən zərər fermerə ödənilir.

Aqrar sığorta ilə bağlı məlumatlar fermerlərin böyük marağına səbəb olub. İş adamları heyvan və bitkilərin sığortası, hadisə baş verəndə ödəniş prosesi, sığortanın əhatə etdiyi risklər və sığortalanma prosesi ilə bağlı «Aqrar Sığorta Müştərək Sığorta Şirkəti» ASC-nin rəhbərinə və ASF-nin nümayəndələrinə çoxsaylı suallar veriblər.

Yerli sakinlər, aqrar sığortanın şərtlərindən və sığorta haqlarının məbləğindən, o cümlədən dövlətin 50%-lik dəstəyindən razı qalıb, onun sərfəli olduğunu bildiriblər.

Görüşdə bildirilib ki, yeni qaydalara əsasən 10 hektar və daha artıq əkin sahəsi olan təsərrüfatlar subsidiya almaq üçün sığorta edilməlidir. Sığorta haqqının yarısını dövlət ödədiyinə görə, bu yenilik fermerlərə ciddi maliyyə yükü yaratmır, əvəzində onların biznesini qoruyur. Fermerlərə tövsiyə olunub ki, payızlıq əkinlərin bəyanı dövründə təsərrüfatlarını əsas risklərdən sığortalansınlar.

Fermerlər sığortalanmaq üçün Aqrar Sığorta Fondunun Cağrı Mərkəzinə (1651) zəng edə, rayonda fəaliyyət göstərən aqrar sığorta sisteminə daxil olan sığorta şirkətlərinə və ya yerli DAİM-lərə müraciət edə bilərlər. Onların müraciətinə dərhal cavab veriləcək və sığorta müqaviləsi bağlanacaq.

BƏNZƏR MƏQALƏLƏR

MÜZAKİRƏ

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Top