Payızlıq əkinlərin EKTİS-də bəyan edilməsi prosesi yekun mərhələyə qədəm qoyub - Economic.Az
MƏZƏNNƏLƏR
FreeCurrencyRates.com

QAYNAR XƏBƏRLƏR

Payızlıq əkinlərin EKTİS-də bəyan edilməsi prosesi yekun mərhələyə qədəm qoyub

Fermerlər öz payızlıq əkinlərini Elektron Kənd Təsərrüfatı İnformasiya Sistemində bəyan etməkdə davam edirlər. Əkinlərin bəyanı dekabrın 30-da başa çatır, prosesin süərtləndirilməsi məqsədilə Kənd Təsərrüfatı Nazirliyi tərəfindən taxılçılıq rayonlarında məlumatlandırma sessiyaları keçirilir. Tədbirlər zamanı fermerlərə subsidiya almaq üçün əkin məlumatları və torpaq sənədlərinin EKTİS-ə daxil edilmə ardıcıllığı, 5 hektardan artıq sahəsi olan torpaq mülkiyyətçilərinin öz sahələrindən torpaq nümunələrinin aqrokimya laboratoriyalarına təqdim etmə proseduru, əkin sahələrinin aqrar sığorta edilməsi barədə geniş məlumat verilir.

Qusar və Xaçmaz rayonlarında keçirilən tədbirlərdə çıxış edən Kənd Təsərrüfatı Nazirliyinin Aparat rəhbəri Rəfael Quliyev bildirib ki, bəyan prosesinin sürətləndirilməsi məqsədilə rayonlarda mərkəzdən uzaq kəndlərə səyyar xidmətlər təşkil olunur, Dövlət Aqrar İnkişaf Mərkəzlərində, ASAN Xidmət Mərkəzlərində xidmət pəncərələri fəaliyyət göstərir. Artıq respublika üzrə payızlıq əkinlərin bəyan prosesi yekun mərhələyə qədəm qoyub və hələ də ən müxtəlif səbəblərdən əkinlərini bəyan etməyən fermerlər bu xidmət pəncərələrinə yaxınlaşaraq subsidiya almaq üçün elektron ərizələrini formalaşdıra bilərlər.

Yanvar ayından başlayaraq bəyan edilmiş əkin məlumatları mənitorinqə cəlb olunacaq, fevral-mart aylarında isə payızlıq əkinlərə görə subsidiyaların ödənişinə başlanacaq. Dekabrın 30-dək əkinlərini bəyan etməyən fermerlər subsidiya almaq hüququndan yararlana bilməyəcəklər.

Qeyd olunub ki, dövlət dəstəyindən daha çox fermerin yararlana bilməsi üçün torpaq üzərində mülkiyyət hüququnu təsdiqləyən sənədlərin alınması vacibdir. Bununla əlaqədar Azərbaycan Respublikasının Prezidenti cənab İlham Əliyev tərəfindən 2021-ci il 7 oktyabr tarixində “Torpaq münasibətlərinin tənzimlənməsi ilə bağlı bəzi məsələlər haqqında” Fərman imzalanıb. Fərmana əsasən rayon aqrar islahat komissiyalarının qərarları ilə təsdiq edilmiş siyahılara əsasən ləğv edilmiş sovxoz və kolxozların özəlləşdirilən torpaqlarından pay almış, lakin bu torpaqlar üzərində mülkiyyət hüququ rəsmiləşdirilməmiş şəxslərin hüquqlarının onların müraciəti əsasında dövlət büdcəsinin vəsaiti hesabına daşınmaz əmlakın dövlət reyestrində qeydiyyata alınması təmin ediləcək.

Fərmana əsasən 2025-ci il yanvarın 1-dən etibarən əkin sahələrinin istifadəçilərinə aqrar sahədə subsidiyalar torpaq sahəsi üzərində mülkiyyət, icarə və ya istifadə hüquqlarına dair daşınmaz əmlakın dövlət reyestrindən çıxarış əsasında veriləcək. Bu səbəbdən vətəndaşlar dövlətin yaratdığı imkanlardan faydalanaraq torpaq üzərində mülkiyyət hüquqlarını rəsmiləşdirməlidirlər.

Görüşdə Fərmanın icra mexanizmi, payızlıq əkinlərin bəyanı, subsidiyaların verilməsi reqlamentinə dair suallar ətraflı cavablandırılıb.

Bununla da Kənd Təsərrüfatı Nazirliyinin taxılçılıq rayonlarında təşkil etdiyi məlumatlandırma sessiyaları başa çatıb. Üç həftə ərzində nazirliyin əməkdaşları 40-dək rayonda görüşlər keçirərək payızlıq əkinlərin bəyanı prosesinin sürətləndirilməsi ilə bağlı maarifləndirmə işləri aparıblar.

BƏNZƏR MƏQALƏLƏR

MÜZAKİRƏ

Bir cavab yazın

Sizin e-poçt ünvanınız dərc edilməyəcəkdir.

This site uses Akismet to reduce spam. Learn how your comment data is processed.

Top