NAZİRLİY BRUSELLYOZA QARŞI ƏN MÜASİR VAKSİNLƏ MÜBARİZƏ APARMAĞA BAŞLAYIB

Kənd Təsərrüfatı Nazirliyi ölkə üzrə xırdabuynuzlu heyvanlarda brusellyoza qarşı kütləvi peyvəndləməyə başlayıb. Heyvanlar Beynəlxalq Epizootik Büronun tövsiyələrinə əsasən, dünya praktikasında istifadə olunan Rev-1 vaksini ilə peyvəndlənir. Bu vaksin göz damcısı formasında tətbiq edilir. Rev-1 vaksini inyeksiya və göz damcısı formasında mövcuddur. İnyeksiya formasında işlədilən Rev-1 vaksini heyvanlarda 2 il müddətində immunitet qazandırır, lakin boğaz heyvanlarda balasalma riski yüksək olur. Rev-1 göz damcısı üsulu ilə peyvənd heyvanlarda brusellyoz xəstəliyinə qarşı 4-5 il müddətinə immunitet yaradır, eyni zamanda, boğaz heyvanlarda balasalma riskini də azaldır.

Bununla belə, istehsalçılar fermerlərə boğaz heyvanları peyvəndləməməyi tövsiyə edirlər.

Kənd Təsərrüfatı Nazirliyinin Dünya Bankı ilə birgə həyata keçirdiyi Kənd təsərrüfatında rəqabət qabiliyyətinin artırılması layihəsi çərçivəsində alınan Rev-1 göz damcısı vaksini İordaniyanın “Jovak” şirkəti tərəfindən istehsal olunub və Beynəlxalq Epizootik Büronun Akkreditə edilmiş Laboratoriyasının keyfiyyət sertifikatına malikdir.

Brusellyoz xəstəliyindən qorunmaq üçün çiy süd və ondan hazırlanmış məhsullardan istifadə etməmək, heyvan alarkən isə, göz damcısı üsulu ilə peyvəndləndiyini bildirilən qulağı çərtilmiş heyvan almaq tövsiyə olunur.