Ağdaşda üç günə 700 hektar sahənin taxılı biçilib

Ağdaş rayonunda taxıl istehsalçıları məhsulu vaxtında və itkisiz toplamaq üçün bütün qüvvələrini səfərbər ediblər. Ötən 3 gün ərzində rayonda 700 hektar sahənin taxılı biçilib. Havanın yağmurlu olması taxıl biçini kampaniyasını qismən ləngidir. Biçin üçün sahələrə 45 kombayn və bir qədər də yük maşını cəlb olunub.

Economic xəbər verir ki, Rayon icra hakimiyyətinin aqrar şöbəsindən AZƏRTAC-a bildiriblər ki, dövlət qayğısından yararlanan ağdaşlı fermerlər bu il təsərrüfatlarında 11 min 93 hektar sahədə taxıl becəriblər. Bu da ötən ildəkindən 745 hektar çoxdur. Taxıl sahələrinin 2619 hektarını buğda, 8474 hektarını arpa təşkil edir. Sahələrdə aqrotexniki tədbirlərin vaxtında və keyfiyyətlə həyata keçirilməsi, ziyanvericilərin qarşısının alınması və hava şəraitinin əlverişli olması nəticəsində bol məhsul yetişib.

Mütəxəssislərin fikrincə, cari ildə məhsuldarlıq ötən illə müqayisədə daha çox, hər hektarda orta hesabla 26 sentner gözlənilir. Hava şəraiti imkan verərsə, rayonda taxıl biçini kampaniyasının iyunun 25-dək başa çatdırılması nəzərdə tutulur. Mexanizator və kombaynçılar taxılın yanğından qorunması və digər təhlükəsizlik qaydalarına əməl edilməsi ilə bağlı təlimatlandırılıblar.