Formula 1-dən Avro 2021-dək
Azərbaycan gərgin mübarizələr, gözlənilməz nəticələrlə yadda qalan Formula 1 Qran prisinə evsahibliyi etdi. Bakı Şəhər Halqası (BŞH) yarışları yüksək səviyyədə təşkil etdi. İstər trekin quruluşu, istər BŞH-ni müşayiət edən paytaxt Bakı, builki Azərbaycan turunun bitməsinə baxmayaraq, Formula 1 həvəskarlarının ən maraqlı gündəm mövzusudur.
Bakı Qran prisinin davam etdiyi günlərdə reportaj hazırlayarkən suallarımızı cavablandıran əcnəbi qonaqlarımız deyirdilər ki, Bakı dövrəsi özünəməxsus quruluşu şəhərdaxili Formula 1 yarışlarında mövcud olan ən maraqlı treklərdən biridir. Turistləri ən çox heyrətləndirən məqam trekin dar zonalarında yolları əhatələyən qala divarları idi ki, bunun yarışlara xüsusi rəng qatdığı hər kəsə məlumdur.
Yarışların bitməsinə, Qran prinin azarkeşsiz keçirilməsinə baxmayaraq, paytaxt küçələrində gəzərkən, tez-tez əcnəbi idman azarkeşləri ilə qarşılaşmaq mümkündür. Belə bir şəhər gəzintisində qarşımıza çıxan, bir-birinə Formula 1 və Avro 2021 plakatlarını göstərən iki dost diqqətimizi çəkdi. Yaxınlaşıb öyrəndik ki, qonaqlarımız İsveçrədən gəliblər. İsveçrə deyən kimi ağlıma Avro 2021-in qrup mərhələsi çərçivəsində İsveçrə yığma futbol komandasının da məhz paytaxtımızda mübarizə aparacağı gəldi. Robin və Jean bizim onlara verdiyimiz ilk sualdaca İsveçrədə uzun müddətdir F-1 yarışı keçirilmədiyini qeyd etdilər. Söhbətimizin bəzi məqamlarını təqdim edirik:
– Əvvəla xoş gəlmisiniz! Azərbaycanda özünüzü necə hiss edirsiniz?
Robin:
– Xoş gördük. Biz ilk dəfədir Bakıya gəlirik. Hər şey əladır. Sizin şəhərinizdə ard-arda iki böyük yarış keçirilir. Sizin buna reaksiyanız da bizim üçün maraqlıdır – deyə Robin sualımıza sualla cavab verdi.
– Yəqin ki, bu, nadir hadisə hesab edilməlidir. Ona görə də həyəcanlıyıq.
– Heyif ki, F-1 bu il azarkeşsiz oldu.
– İzləmək şansınız oldu?
– Biz, əslində, milli komandanı izləmək üçün Bakıya gəlməyi planlayırdıq. Amma daha sonra qərar verdik ki, bir neçə gün əvvəl gəlib Formula 1-i də izləyək. Sonra builki Qran prinin azarkeşsiz olacağını öyrəndik. Amma burada oyunları qismən də olsa izləyə bildik. Final turunu isə TV-dən izlədik. Yarışlar çox həyəcanlı idi. Sonda baş verən qəza isə hər zaman olduğu kimi, Bakıdakı gözlənilməz hadisələrdən idi.
– Avropa kubokunda millinizin şanslarını necə dəyərləndirirsiniz?
Bu sualımıza Jean cavab verdi:
– Biz bilirik ki, Azərbaycanda insanlar Türkiyə millisini dəstəkləyirlər. Ona görə də biz burada ortaq bir qərara gəlməliyik. Türkiyə və İsveçrə millilərinin qrupdan növbəti mərhələyə yüksələcəyini düşünürəm.
Robin müdaxilə etdi:
– Düşünürəm ki, İsveçrə millisi qrup mərhələsini keçərsə, artıq bu uğur sayılmalıdır. Realist olmaq lazımdır. Ağır qrupa düşmüşük.
Jean:
– Hər halda, ciddi mübarizə gedəcək. Təslim olmaq bizə yaraşmaz.
Daha sonra Robin bizdən Formula 1 Qran prisi zamanı lider Ferstappenin qəzaya uğradığı yeri göstərməyimizi istədi. Dedi ki, bu həyəcanverici an idi. O zonanı tapıb xatirə şəkli çəkdirmək istəyirlər. Ümumiyyətlə, əllərində fotoaparatlar olan iki dost addımbaşı dayanır, Bakını öz xatirələrinə həkk edirdilər.
BƏNZƏR MƏQALƏLƏR
-
Nazir Sahil Babayev: 5400 şəxs daimi işə cəlb olunub
Nazir Sahil Babayev: 8000-dək şəhid ailəsi üzvü və müharibə əlili özünüməşğulluq proqramına, 5400 şəxs daimi […]
-
Kabanyan məxfi məlumat bölüşdü: 6 km Bakıya keçdi
Bizdə olan məxfi məlumata əsasən, rusiyalı mütəxəssislər Zəngəzurda yolçəkmə işləri ilə məşğuldur. Prossesə ciddi şəkildə […]
-
Ceyhun Bayramov Tehrana səfərə gedir
Azərbaycanın xarici işlər naziri Ceyhun Bayramov iranlı həmkarı Hüseyn Əmir Abdullahianın dəvəti ilə yaxın […]