Mərmərə Qrupunun rəhbəri “Monqolustan Sülh” medalına layiq görülüb

İstanbul, 7 avqust, Günel Karatepe, AZƏRTAC

Mərmərə Qrupu Strateji və Sosial Araşdırmalar Vəqfinin sədri, professor Akkan Suver sülh və Türk-Monqolustan münasibətlərində yüksək xidmətlərinə görə “Monqolustan Sülh” medalına layiq görülüb.

Bu barədə AZƏRTAC-a məlumat verən professor Akkan Suver medalın ona İstanbulda keçirilən rəsmi mərasimlə təqdim edildiyini deyib.

Bildirilib ki, tədbirdə Türkiyədə səfərdə olan Monqolustan Sülh və Dostluq Federasiyasının direktorları, Monqolustanın Ankaradakı səfiri Gombosuren Munkbare və türk tarixçi, böyük elm xadimi professor İlber Ortaylı da iştirak ediblər.

Tədbirdə çıxış edən professor İlber Ortaylı iştirakçılarla tarixi biliklərini bölüşüb. Monqolustanın Ankaradakı səfiri isə Akkan Suverə ötən illər ərzində sülhlə bağlı dialoqa göstərdiyi səylərinə görə təşəkkürünü ifadə edib.