“Mən, Lalə, bir də Şerlok Holms” adlı serialın çəkilişləri davam edir

Bakı, 6 iyul, AZƏRTAC

İctimai Televiziyanın layihəsi olan “Mən, Lalə, bir də Şerlok Holms” adlı 12 bölümlük serialın çəkilişləri davam edir.

AZƏRTAC xəbər verir ki, yeni ekran əsərinin ssenaristləri Tural Sevdimalı və Vüqar Hüseynov, quruluşçu rejissoru isə Rüfət Şahbazovdur.

Ailəvi komediya və fantastika janrında çəkilən serialın əsas qəhrəmanı 7-ci sinif şagirdi Muraddır. Zəngin fantaziyaya malik bu obraz hər seriyada bir kitab oxuyur və kitabın qəhrəmanı xəyalında canlanaraq ona gündəlik çətinliklərini həll etməyə kömək edir.

Ekran işi biliklərin insanın həyatında xilasedici rolundan danışır, qohumcanlığa, dostpərvərliyə səsləyir. Hər kəsin şirin xatirələrində olan uşaqlıq illəri və macəra arzusunu canlandırır.