Elmir Vəlizadə: “Azerspace-1” layihəsi iqtisadi mənfəətlə fəaliyyət göstərir

“Azerspace-1” layihəsi iqtisadi mənfəətlə fəaliyyət göstərir.  Növbəti il 2-ci peyk kosmosa göndərildikdən sonra Azərbaycanın bu sahədə fəaliyyət imkanları daha da genişlənəcək. Ölkədə rəqəmsal yayıma tam keçid isə yaxın zamanlarda reallaşdırılacaq.

Azərbaycanın “Azerspace-1” telekommunikasiya peykinin buraxılması layihəsi iqtisadi məqsədyönlüyünü doğrultdu. Artıq Azerspace-1 peyki dünyanın peyk sistemləri arasında öz yerini tutub. Hazırda peykin resurslarından bir çox ölkələr istifadə edir və onların sayı daim artır. 2013-cü  ilin fevral ayında orbitə buraxılan Azərspace-1 peyki 46° Şərq uzunluğu orbital mövqeyində yerləşir və Avropa, Afrika, Yaxın Şərq, Qafqaz və Mərkəzi Asiya regionlarını əhatə edir. Rabitə və yüksək texnologiyalar nazirinin müavini Elmir Vəlizadə jurnalistlərə açıqlamasında bu barədə məlumat verdi. Bildirid ki, hazırda “Azerspace-2” telekommunikasiya peykinin tikintisi istıqamətində işlər aparılır. Yeni peykin 2017-ci ildə orbitə buraxılması planlaşdırılır.

Azərbaycanda rəqəmsal yayıma tam keçid isə müəyyən texniki və təşkilati məsələlərin həllini tələb edir. Nazir müavinin sözlərinə görə, hazırda rəqəmsal televiziya infrastrukturunun hazırlığı yüksək səviyyədir və ölkə əhalisinin təqribən 99 faizi rəqəmsal siqnal yayımı ilə əhatə olunub. Hazırda analoq yayım da paralel olaraq davam etdirlir və bu yayımın dayandırılması bəzi xırda məsələlərin həllini gözləyir.