“Dağıstan” yenidən Xəzər sularında

“Azərbaycan Xəzər Dəniz Gəmiçiliyi” QSC-nin (ASCO) Dəniz Nəqliyyatı Donanmasına məxsus “Dağıstan” gəmi-bərəsi əsaslı təmir edilib.

Bu barədə ASCO məlumat yayıb.

“Zığ” Gəmi Təmiri və Tikintisi Zavodunda aparılan təmir işləri qısa müddətdə və yüksək keyfiyyətlə həyata keçirilib. Baş və köməkçi mühərriklərin əsaslı təmiri ilə yanaşı, gəmi üzrə gövdə-qaynaq, boru, elektrik-quraşdırma və avtomatika işləri yerinə yetirilib. Həmçinin gəmi mexanizmlərinin (nasosların, separator, kompressor) təmiri aparılıb”, – məlumatda deyilir.

“Dağıstan” gəmi-bərəsində komanda-yayım qurğusu, sürət ölçən laq qurğusu əsaslı təmir olunub, iki ədəd stasionar UQD radiostansiya üçün anten quraşdırılıb, radionaviqasiyaya aid avadanlıqlar yoxlanılıb və təmir olunub.

Eyni zamanda “Dağıstan” gəmisinin sualtı və suüstü hissəsi, baş göyərtəsi, maşın şöbəsi və üst qurumu təmizlənərək rənglənib, heyətin yaşayış və xidməti otaqları müasir tələblər səviyyəsində təmir edilib.

ASCO-dan bildirilib ki, dəniz sınaq yoxlamasından uğurla çıxan gəmi-bərə yenidən istismara qaytarılıb.