Avropa Parlamenti Macarıstanın Şengen zonasında iştirakının dayandırılmasını istəyir
Bakı, 5 avqust, AZƏRTAC
Avropa Parlamenti Budapeştin Rusiya və Belarus da daxil olmaqla, səkkiz ölkənin vətəndaşları üçün viza rejimini yüngülləşdirmək qərarından sonra Macarıstanın Şengen zonasında iştirakının dayandırılması üçün Avropa Komissiyasına müraciət edib.
AZƏRTAC “Politico” nəşrinə istinadla xəbər verir ki, Avropa Parlamentinin Çexiya və Litvadan olan deputatları Danuşe Nerudova və Pyatras Auştryaviçyus Macarıstanın müvafiq qərarının araşdırılması üçün Avropa Komissiyasına məktub göndərib. Məktub müəlliflərinin sözlərinə görə, Budapeştin bu addımı üzv ölkələrin vətəndaşları üçün Şengen zonasının təhlükəsiz məkan rolunu potensial təhlükə altına alır. Deputatların fikrincə, Macarıstan hökuməti öz siyasətini dəyişməsə, Avropa Komissiyası və Avropa İttifaqının bütün üzvləri Budapeştin Şengen zonasındakı mövcudluğunu şübhə altına almalıdır. Məktubda təklif olunan tədbirlər arasında Macarıstan sərhədlərində nəzarətin tətbiqi və bu ölkənin vizalarının tanınmaması da yer alıb.
“Politico” nəşrinin yazdığına görə, sənəddə Belçika və İrlandiyanın sabiq baş nazirləri də daxil olmaqla 70-ə yaxın nüfuzlu siyasətçinin imzası var.
Bir müddət öncə bir sıra Avropa KİV-ləri Macarıstanın bəzi ölkələr, o cümlədən Rusiya və Belarus vətəndaşları üçün viza rejimini yüngülləşdirməyi qərara aldığını yazıb. İyulun 30-da Avropa Komissiyası Macarıstandan bu qərarla bağlı izahat tələb edib. Avqustun 1-də isə Latviya Prezidenti Edqars Rinkeviçs viza güzəştləri səbəbindən Macarıstanın Şengen zonasında iştirakının məhdudlaşdırmasını istəyib.
Qeyd edək ki, Avropa İttifaqının qaydalarına görə, hər bir ölkə miqrasiya siyasətini və onun tətbiqini özü müəyyənləşdirə bilər. Eyni zamanda, Aİ-yə daxil olmayan ölkələrin vətəndaşları ittifaq ərazisinə gəldikdən sonra 27 icma ölkəsinin, həmçinin Norveç və İsveçrənin daxil olduğu Şengen zonasında sərbəst hərəkət etmək imkanına yiyələnir.
BƏNZƏR MƏQALƏLƏR
-
Laçında daha 18 ailəyə evlərinin açarları təqdim olunub – YENİLƏNİB
Laçın, 11 sentyabr, Aydın Yavərzadə, AZƏRTAC Bu gün növbəti köç karvanı ilə Laçın şəhərinə çatan […]
-
Tanınmış alimlər beynəlxalq layihə çərçivəsində elmi tədqiqatlarını təqdim ediblər
Bakı, 11 sentyabr, AZƏRTAC Avropa Elmi Tədqiqat Şurasının (European Research Council) dəstəklədiyi “Son neandertallar” layihəsinin […]
-
Dağlıq və dağətəyi rayonlarda arabir yağış yağacağı, şimşək çaxacağı gözlənilir
Bakı, 11 sentyabr, AZƏRTAC Azərbaycanda sentyabrın 12-nə gözlənilən hava proqnozu açıqlanıb. Ekologiya və Təbii Sərvətlər […]