Argentinada hökumətin islahatlarına qarşı etirazlar keçirilir
Bakı, 14 iyun, AZƏRTAC
Argentina Prezidenti Xavyer Miley öz ölkəsində sərt qənaət tədbirləri tətbiq etmək niyyətindədir, lakin bu qərar kütləvi müqavimətlə qarşılaşdı.
AZƏRTAC Argentina mediasına istinadla xəbər verir ki, Buenos-Ayresdə yeni islahatların müzakirə olunduğu konqres binası qarşısında nümayişçilərlə polis arasında şiddətli toqquşmalar baş verib. Maskalı şəxslər polisə daş və yandırıcı vasitələr atıb, polis isə nümayişçilərə qarşı dəyənək və gözyaşardıcı qazdan istifadə edib.
Məlumata görə, bir neçə avtomobil yandırılıb, polis 20-yə yaxın şübhəlini həbs edib.
Milli Konqresin senatorları Prezident Xavyer Miley hökumətinin kompleks islahatlar paketini müzakirə ediblər və nəhayət, onu səs çoxluğu ilə təsdiqləyiblər. Qanunvericilik təşəbbüsü, digərləri ilə yanaşı, bir sıra dövlət şirkətlərinin özəlləşdirilməsini, böyük investorlar üçün vergi güzəştlərini və əmək bazarı və vergi islahatlarını nəzərdə tutur. Hökumət artıq parlamentdə çoxluğa nail olmaq üçün tədbirlərin siyahısını əhəmiyyətli dərəcədə azaltmalı olub. Qanunun mətnindəki müxtəlif dəyişikliklərlə əlaqədar olaraq o indi deputatlar Palatasına qayıdır.
Argentina dərin iqtisadi böhran içindədir. Ölkədə inflyasiya dünyada ən yüksək göstəricilərdən birinə malikdir.
Ultra liberal Prezident Xavyer Miley radikal sərt qənaət proqramı vasitəsilə bir vaxtlar zəngin bir ölkəni lazımi yola qaytarmaq istəyir. Hökumət dövlət sektorunda minlərlə iş yerini ixtisara salıb, subsidiyaları azaldıb və sosial proqramları ixtisar edib. Argentina Katolik Universitetinin məlumatına görə, Argentina sakinlərinin təxminən 56 faizi yoxsulluq həddində, təxminən 18 faizi səfalət içində yaşayır.
BƏNZƏR MƏQALƏLƏR
-
Laçında daha 18 ailəyə evlərinin açarları təqdim olunub – YENİLƏNİB
Laçın, 11 sentyabr, Aydın Yavərzadə, AZƏRTAC Bu gün növbəti köç karvanı ilə Laçın şəhərinə çatan […]
-
Tanınmış alimlər beynəlxalq layihə çərçivəsində elmi tədqiqatlarını təqdim ediblər
Bakı, 11 sentyabr, AZƏRTAC Avropa Elmi Tədqiqat Şurasının (European Research Council) dəstəklədiyi “Son neandertallar” layihəsinin […]
-
Dağlıq və dağətəyi rayonlarda arabir yağış yağacağı, şimşək çaxacağı gözlənilir
Bakı, 11 sentyabr, AZƏRTAC Azərbaycanda sentyabrın 12-nə gözlənilən hava proqnozu açıqlanıb. Ekologiya və Təbii Sərvətlər […]