Yasamal sakinləri seçki prosesində fəal iştirak edirlər

Bakı, 1 sentyabr, AZƏRTAC

16 saylı Yasamal ikinci seçki dairəsinin 29 saylı seçki məntəqəsində vətəndaşlar istirahət günü olmasına baxmayaraq, səhər saatlarından etibarən istədikləri namizədə səs vermək üçün məntəqəyə üz tutublar. Ərazi üzrə seçici sayı 1334-dür.

Seçicilərin səsvermə prosesində böyük ruh yüksəkliyi ilə iştirak etdiklərini diqqətə çatdıran məntəqə seçki komissiyasının sədri Elnarə Əliyeva AZƏRTAC-a deyib ki, MDB, Türkiyə, Polşa və digər xarici ölkələri və beynəlxalq təşkilatları təmsil edən 15-dən çox müşahidəçi saat 15.00 radələrinə kimi məntəqədə olublar: “Beynəlxalq müşahidəçilər seçki prosesinin gedişatını qənaətbəxş hesab ediblər. Məntəqəmizdəki səliqə-sahman, şərait onların xoşuna gəldi. İndiyədək daşınan qutumuz olmayıb. Seçicilərimiz arasında 70 yaşdan yuxarı vətəndaşlarımıza təklif etsək də, onlar özləri gəlib səs verməyə üstünlük veriblər. Onların sayı əllidən çoxdur”.

E.Əliyeva məntəqədə vətəndaşların rahat səs verə bilmələri üçün hərtərəfli şəraitin yaradıldığını bildirib.