Şəki rayonunun Orta Zəyzid kəndində fəaliyyət göstərən “Şəki Aqro İndastris” MMC-nin südçülük-maldarlıq üzrə özəl damazlıq təsərrüfatında olan inəklərin hər birindən 2016-cı ildə orta hesabla 6 min 631 kiloqram süd sağılıb. Bu göstərici əvvəlki illə müqayisədə 2 min 85 kiloqram çoxdur. Gün ərzində hər inəkdən orta hesabla 18,2 kiloqram süd sağılıb ki, bu da orta rayon göstəricisindən 3 dəfəyə yaxın çoxdur.
Rayonda cins maldarlığın inkişafına mühüm töhfələr verən bu müəssisədə ötən il ümumilikdə 3 min 77 ton süd istehsal olunub ki, bu da əvvəlki illə müqayisədə 645 ton çoxdur. Hazırda təsərrüfatda “Holştin-friz” (Hollandiya) cinsindən olan 1292 baş iri buynuzlu heyvan saxlanılır. Heyvanların sayı əvvəlki illə müqayisədə 132 baş artıb. Təsərrüfatda olan heyvanların 464 başı ana maldır. 2016-cı ildə müəssisədə hər 100 baş ana maldan 98 bala olmaqla, ümumilikdə 454 baş buzov doğulub.
Qeyd edək ki, 2008-ci ildə dövlətin maliyyə dəstəyi ilə yaradılan bu iri heyvandarlıq kompleksinə fermalar, sağım sexi, laboratoriya və yardımçı tikililər daxildir. Kompleksdə alman şirkətinin istehsal etdiyi bir mərkəzdən idarə olunan ən müasir avadanlıq quraşdırılıb. Sağım sexində quraşdırılan avadanlığın köməyi ilə bir dəfəyə 32 baş inəyin südünün ətraf mühitlə təması olmadan sağılması, toplanması, soyudulması və saxlanması təmin olunur.
