"Müasir incəsənətin Azərbaycanda ifadə formaları" mövzusunda vebinar keçirilib - Economic.Az
MƏZƏNNƏLƏR
FreeCurrencyRates.com

QAYNAR XƏBƏRLƏR

“Müasir incəsənətin Azərbaycanda ifadə formaları” mövzusunda vebinar keçirilib

ECONOMİC: Aprelin 15-də Dövlət Turizm Agentliyi və Azərbaycan Turizm Bürosunun təşəbbüsü ilə virtual “Salon” (“Salons”) silsilə tədbirlərindən beşincisi keçirilib.

Nyu-York İncəsənət və Dizayn Muzeyinin Fəxri sədri Barbara Toberin dəstəyi ilə təşkil olunan vebinar “Liberallıq və transformasiya: Müasir incəsənətin Azərbaycanda ifadə formaları” mövzusuna həsr olunub.

Tədbirdə “Azərbaycan Müasir İncəsənəti” kitabının müəllifi Lesli Qrey və qalerist-kurator Əfsanə Tahirova spiker qismində iştirak edib.

Təqdimata Sovet hakimiyyəti üçün səciyyəvi olan rəssamlıq nümunələrindən başlayan Ə. Tahirova o dövrdə fəaliyyət göstərmiş Tahir Salahov, Mikayıl Abdullayev, Əşrəf Murad, Mircavad və Tofiq Cavadov qardaşları, Səttar Bəhlulzadə və Toğrul Nərimanbəyov kimi görkəmli sənətkarların adlarını çəkib və onların SSRİ tərəfindən sosialist realizm cərəyanı çərçivəsində göstərilən təzyiqə birbaşa və ya dolayı yolla öz etirazlarını əks etdirdikləri əsərləri haqqında məlumat verib.

Vebinarın sonunda müxtəlif sualları cavablandıran spikerlər Azərbaycanda müasir incəsənət nümunələrini formalaşdıran amillər arasında antropoloji təsirlərin xüsusi yer tutduğunu, eləcə də gənc sənətkarların öz əsərlərində milli-mənəvi dəyərlərlə yanaşı daha ümumbəşəri hadisələrə yer verərək özlərini ifadə etdiklərini bildiriblər.

Qeyd edək ki, 15 aprel UNESKO tərəfindən Dünya İncəsənət Günü kimi qeyd edilir.

Məlumat üçün bildirək ki, indiyədək təşkil olunan “Salon” silsilə tədbirlərindən əvvəlkilər “Sülh, Saziş və Transqafqaz regionu: Azərbaycana İqtisadi Baxış” mövzusu ilə Azərbaycanın biznes mühiti və iqtisadi əlaqələrinə, “İpək Yolunda Mədəniyyət, Həyat Tərzi və Biznes: Qafqaz Regionunda Optimizm Rəmzi olan Müasir Memarlığa Diqqət” mövzusu ilə Azərbaycanda memarlıq sənətinin inkişafı və tarixinə, “Əsrlər boyunca Cazibə: Azərbaycan Xalçalarının Tarixi” mövzusu ilə Azərbaycan xalçaçılığına, “İpək Yolunun Sirləri: Azərbaycanda şərabçılıq sənayesinin gələcəyi” mövsusu ilə Azərbaycanın şərabçılıq ənənələrinə həsr olunub.

BƏNZƏR MƏQALƏLƏR

MÜZAKİRƏ

Bir cavab yazın

Sizin e-poçt ünvanınız dərc edilməyəcəkdir.

This site uses Akismet to reduce spam. Learn how your comment data is processed.

Top