4 oktyabr 2018-ci il tarixində Azərbaycanın Beynəlxalq Multikultural Şəbəkəsi Türkiyə fəaliyyəti çərçivəsində  ölkənin  Manisa  şəhərində yerləşən Manisa Celal Bayar Universitetində  “Beynəlxalq Multikultural Şəbəkənin İnkişafı: Multikultural Təhsil ve Öyrənmə Metodologiyası  ”  adlı beynəlxalq elmi konfrans keçirdi. Tədbir Beynəlxalq Multikultural Şəbəkənin təsisçisi və rəhbəri, sosial fəlsəfə üzrə fəlsəfə doktoru Xəyalə Məmmədova və şəbəkənin Türkiyə üzrə rəsmi təmsilçisi Dosent  Ülviyye Sanılı Aydının təşkilatçılığı ilə təşkil olunmuşdur.

Economic-ə verilən məlumata görə, tədbirdə Beynəlxalq Multikultural Şəbəkənin müxtəlif ölkələrdə fəaliyyət göstərən təmsilçiləri, Manisa Celal Bayar Universitetinin rəhbərlik nümayəndələri, müəllim və  tələbə heyəti iştirak etdi.

Konfransın açılışında moderator Dr.Faika Çelik konfrans haqqında məlumat verərək, açılış nitqi üçün sözü İqtisadiyyat və Menecment Fakültəsinin Dekanı, Professor  Mustafa Miynata verdi.Natiq çıxışında  Anadolu torpaqlarının  yüz illik multikultural həyat tərzini menimsədiyinə, eyni zamanda, bəşəriyyətin müasir sivilizasiya səviyyəsinə  çatmasında böyük töhfələr bəxş etdiyinə diqqət çəkərək, bu mənada Beynəlxalq Multikultural Konfransın məhz Türkiyədə, Manisada təşkil olunmasının təsadüfi olmadığını söyledi.

Növbəti çıxış üçün  söz Beynəlxalq Multikultural Şəbəkənin rəhbəri Xəyalə Məmmədovaya verildi. Xəyalə Məmmədova Beynəlxalq Multikultural Şəbəkənin geniş fəaliyyəti,ölkə təmsilçilərinin dəstəyi ilə  multikultural təhsil  sahəsində apardıqlar elmi-araşdırmaları və Azərbaycanın uğurlu multikultural modeli haqqında konfrans iştirakçılarını geniş məlumatlandırdı.

Konfransın davamında  Beynəlxalq Multikultural Şəbəkənin Pakistan  təmsilçisi  Umer İrfan Multikultural cəmiyyət üçün  etik təhsil, Türkiyə üzrə təmsilçi Dosent  Ülviyye Sanılı Aydın  Multikultural təhsili öyrənmə metodologiyası,  Beynəlxalq Multikultural Şəbəkənin elmi araşdırmacısı Muhamməd Nadeem Qlobalizasiya və Multikultural cəmiyyət, Dr.Haktan Birsel Cənubi Asiyada etnik azlıqlar haqqında maraqlı çıxışlar etdilər.

Konfransın maraqlı məqamlarından biri də  ABŞ-ın  Kaliforniya Berkeley Universitetinin multkultural təhsil üzrə professoru  Jabari Mahirinin konfrans üçün özəl  olaraq , video şəklində “Multikultural təhsil sahəsində müəllimlər üçün  təhsil və tədris “ adlı mühazirə ilə cıxış etməsi oldu.

Konfransda Beynəlxalq Multikultural Şəbəkəsi  tərəfindən  Azərbaycanın tarixi, mədəniyyəti və  uğurlu multikulturalizm modelinin formalaşması haqqında  hazırlanmış video da konfrans iştirakçılarına təqdim edildi.

Konfransın sonunda   Beynəlxalq Multikultural Şəbəkənin  rəhbəri Xəyalə Məmmədova  və şəbəkənin Türkiyə üzrə rəsmi təmsilçisi Dosent  Ülviyye Sanılı Aydın  beynəlxalq elmi-konfransa dəstək göstərən  natiqləri, təmsilçiləri  və təşkilatçıları Beynəlxalq Multikultural Şəbəkənin Diplomları ilə təltif etdilər.

Konfrans bitdikdən sonra Manisa Celal Bayar Universitetinin rəhbərliyinin təşkilatçılığı ilə konfransa qatılan qonaqlara, Beynəlxalq Multikultural Şəbəkənin nümayəndələrinə Manisa şəhərinin tarixi yerlərini gəzdirmək üçün maraqlı səfər təşkil etdilər.