Azərbaycan idmançıları V Dünya Köçəri Oyunlarının açılışında iştirak ediblər YENİLƏNİB

Astana, 8 sentyabr, AZƏRTAC

Sentyabrın 8-də Astanada V Ümumdünya Köçəri Oyunlarının təntənəli açılış mərasimi keçirilib.

AZƏRTAC-ın məlumatına görə, “Astana Arena” stadionunda reallaşan mərasimdə əvvəlcə iştirakçı ölkələrin təntənəli paradı keçirilib. Tribunalar qarşısından keçən atletlər arasında Azərbaycan idmançıları da yer alıb.

Açılış mərasiminə gətirilən Qazaxıstanın dövlət bayrağı və Ümumdünya Köçəri Oyunlarına aid bayraq havaya qaldırılıb, eləcə də Qazaxıstanın Dövlət Himni və Ümumdünya Köçəri Oyunlarının himni səsləndirilib.

Mərasimdə çıxış edən Qazaxıstan Prezidenti Kasım-Jomart Tokayev oyunları rəsmən açıq elan edib.

Tədbir, həmçinin V Dünya Köçəri Oyunlarının Təşkilat Komitəsinin sədri Roman Sklyar və Dünya Etnoidman Konfederasiyasının prezidenti Bilal Ərdoğan çıxış ediblər.

Bu böyük idman hadisəsinin açılış mərasimində iştirak etmək üçün Astanaya gələn yüksək səviyyəli qonaqlar arasında Tatarıstan rəhbəri Rüstəm Minnixanov, Türkmənistanın Xalq Məsləhətinin sədri Qurbanqulu Berdıməhəmmədov, Saxa (Yakutiya) Respublikasının başçısı Aysen Nikolayev, Özbəkistan Prezidenti Şavkat Mirziyoyev, Qırğızıstanın dövlət başçısı Sadır Japarov da olub.

Qeyd edək ki, Astananın ən yaxşı idman meydançalarında 21 yarış növü üzrə mübarizə aparılacaq. Bunlara at yarışları, milli güləş növləri, ənənəvi intellektual oyunlar, döyüş növləri üzrə yarışlar, ənənəvi oxatmadan oyunlar, quşlarla ənənəvi ov növləri, at üstündə yarışlar, xalq oyunları daxildir.

Bu böyük tədbir çərçivəsində 10 hektar ərazidə “Köşpendiler Əlemi” (“Köçərilər Dünyası”) etnoaulu qurulub. Burada hər kəs qazax xalqının zəngin dünyasına dala və köçəri xalqların özünəməxsus mədəniyyəti ilə tanış ola bilər.

18:54

Astanada sentyabrın 8-də V Dünya Köçəri Oyunlarının təntənəli açılış mərasimi olub.

AZƏRTAC xəbər verir ki, mərasim “Astana Arena” stadionunda 3 min sənətçinin iştirakı ilə reallaşıb.

Əvvəlcə iştirakçı ölkələrin komandaları əlifba sırası ilə ayrı-ayrı qruplar şəklində təntənəli yürüş ediblər. Azərbaycan idmançıları da bu yürüşdə yer alıblar.

Yarışlarda Azərbaycan 8 növ üzrə 54 idmançı ilə təmsil olunur.

V Dünya Köçəri Oyunları sentyabrın 13-dək davam edəcək. Tədbirdə 89 ölkədən təxminən 2800 iştirakçının qatılması gözlənilir. Oyunlarda 21 idman növü üzrə 97 dəst medal uğrunda mübarizə aparılacaq.

Elşən Rüstəmov

AZƏRTAC-ın xüsusi müxbiri

Astana